ДIадаханчу пIераскана дийнахь боккха кхаъ хилира лаьмнийн Итон-Кхаьллан кIоштарчу Кхокхада йуьртан бахархошна – кхузахь схьадиллина, 2 бIе ламаз дечунна лерина, керла маьждиг.
Билгалдакха догIу, хIара башха Делан ЦIа дина Нохчийн Республикин хьалхьарчу Президентан, Россин Турпалхочун Кадыров Ахьмад-Хьаьжин цIарахчу Регионан Йукъарчу фондан чоьтах.
ЦIечу кибарчигца, къоман гIишлошйаран ламастехь динчу маьждиган 12 метр лекха мимар мел генара а гуш йу. Лаьмнийн кIоштан бахархойн хазахетар декъа кхузахь гулбеллера алссам хьеший а, меттигера къаной а, баккхий нах а, кегийрхой а. РогIера Делан ЦIа схьаделларан сийлахьчу гIуллакхехь дакъалецира Нохчийн Республикин муфтис Межиев Салахь-Хьаьжас а. Гулбеллачу махкахошка вистхуьлуш, цо билгаладаьккхира: – Тахана вай гулделла доккхачу ниIмате, керла маьждиг – адамаш Далла сужуде оьху меттиг схьайелла. Йоккха исбаьхьалла йолуш маьждигаш ду вайн махкахь – Шелахь, Пайхамаран (I.с.в.) цIарахь маьждиг ду, Соьлжа-ГIалахь, «Нохчийчоьнан дог» олуш долу, Ахьмад-Хьаьжин (Дала гIазот къобалдойла цуьнан) цIарах маьждиг ду. Дерриге а вайн махкахь 1333 Делан ЦIа ду, царах кхушара дина 24 а, деш 83 а ду. Вай дагардина девр доцуш башха исбаьхьаллаш йу уьш. Маьждиг дан таро йерш дукха бац, амма церан могIарехь хила аьтто-м бу вайн – цу Делан цIа чохь жамаIат латтош, Iибадат дарца маьждиг чуьра хаздаран декхар кхочушдарехь.
Шен къамелехь кIоштан администрацин куьйгалхочо Бурсагов ИбрахIима а билгалдаьккхира: – Вайн районехь де-дийне мел дела беркате, хаза хийцамаш хуьлу. Цу хийцамийн тоьшалла ду Ахьмад-Хьаьжин (Дала гIазот къобалдойла цуьнан) некъ нийса некъ, беркате некъ хиларан. Кху кIоштан цхьаьна йуьртана хилла Iаш дац хIара беркате совгIат, йерриге а районна а доккха совгIат ду вайн мехкан куьйгалхочо Рамзан-Хьаьжас а, Мехкананас Аманус кху йуьртана дина хIара совгIат – маьждиг. Дала къобал сагIадойла церан хIара башха гIуллакх, Дала диканца бекхам бойла царна.
Керлачу маьждига чохь хьалхара рузба-ламаз а дира, мовлад а йийшира, сагIа а даьккхира. Дала беркате дойла хIара рогIера Делан ЦIа!
Р.РИЗВАНОВ
