Нохчийн Республикин хьалхарчу Президентан, Россин Турпалхочун Кадыров Ахьмад-Хьаьжин (Дала гIазот къобалдойла цуьнан) 71 шо кхачарна лерина Итон-Кхаьллан кIоштахь кхочушдиначу гIуллакхехь цхьаъ дара – Къуръан дешаран конкурс дIайахьар.
Цигахь дакъалецира кIоштан йарташкарчу кегийрхоша. Конкурсах лаьцна дийцира Хьачара йуьртан имама Хунариков Супйана:
– Ала деза, вайн кIоштахь даима а хилла Къуръанца гергарло долу дика нах, советан Iедалан заманахь цуьнан маршо йоцучу хенахь а, цул хьалха а. Кху лаьмнийн кIоштарчу дахаран гIаролехь лаьтташ – зуда йалор-йахар дерзош, стаг кхалхар дерзош, маслаIат оьшучу меттехь карош, иштта гIуллакхаш дерзор церан декхар а хеташ, дуккха а дешна нах хилла. Цара шайн декхарш кхочушдина вайн халкъ махкахдаьккхинчу халачу заманчохь а. Царах бу вайн кIоштахь бевза Боки Арсмак, Ацин Жабраил, Хьуьнарк ИбрахIим, Итаев Махьма-Хьаьжа, иштта дуккха а кхиберш а. Церан некъаца баха охIла болуш вайн кегийрхой хилар, тахана вайна боккха йухькIам бу. Нохчийчоьна хьалхарчу Президентан сийнна лерина вайн районехь дIайаьхьначу Къуръан дешаран конкурсехь дакъалаьцначех хьалхара меттиг йаккхина сан йуьртахочо Давтаев Абраила. Хьафиз а ву, ша дика кIант а ву иза, дечу гIуллакхна бIо ца къажош, шен ден дика накъост а ву, цул сов, кху деношкахь вайн кIоштахь дIайаьхначу лаьмнийн некъашца вадарна леринчу Москван чемпионатехь а толам баккхина цо. Вайн конкурсехь 2-гIа меттиг йаьккхира Адуев Мовсара, 3-ниг Арсамаков Iадлана. Царна лерина совгIаташ делира Ахьмад-Хьаьжин цIарахчу Регионан Йукъараллин фондо.
