Нохчийн Республикин Куьйгалхочуьнца Кадыров Рамзанца шен хиллачу вовшахкхетарехь Нохчийн Республикин Правительствон а, Администрацин а куьйгалхочо Таймасханов ГIаласа довзийтира карарчу шеран бекарг баттахь вайн махкахь дIахьон йолчу Россин Президентан харжамашна кечамбарах лаьцна.
Шен къамелехь ГI.Таймасхановс билгалдаьккхира, вайн регионехь 808 эзар харжамхо хилар а, и терахь вайн мехкан берриге а бахархойн 50 процент бен цахилар а. Ишттачу балхахь вайн долчу доккхачу зеделлачух доьзна доцуш, харжамхойн терахь алсамдалар бахьана долуш, бан безарг алссам болх хилар а довзийтира цо. Шеко йоцуш, кхолла безаш бу харжамхойн лаам хиларан билламаш, цу дуьхьа кхоьллина кIоштийн а, муниципальни а урхаллашкахь 17 штаб. Цара меттигерчу хьоле хьаьжжина, билгалдийр ду харжамашна кечамбарехь кхоллалуш долу хаттарш а, нислуш йолу проблемаш а, уьш эвсараллица дIасалуьстуш, къаста а йийр йу.
Шен къамелехь НР Правительствон а, Администрацин а куьйгалхочо дийцира регионехь болх беш йерриге а 217 штаб хилар а, цара кхочушдо харжамийн каппашкахь технически декъехь долу гIуллакхаш а, иштта бахархошна бовзуьйту тIекхочучу харжамех болу хаамаш а, йовзуьйту регионан куьйгаллин мохк кхиаран декъехь йолу планаш а.
Нохчийн Республикин Мехк-Дас Кадыров Рамзана Iедалан органашна хьалха хIоттийна коьрта Iалашо – харжамийн болх лаккхарчу тIегIанехь дIабахьар, регионехь кхочушйийриг хилар а довзийтира ГI.Таймасхановс.
Нохчийн Республикин Куьйгалхочо баркалла элира ГI.Таймасхановна харжамийн декъехь бечу балхана, иштта цо билгалдаьккхира, харжамашкахь дакъалаца бакъо йолчу вайн регионан хIора а харжамхочо дакъалаца деза цигахь шен граждански декхар кхочушдеш.
«Вайн берриге а мехкан кхоллам боьзна бу оцу харжамех, – элира Мехк-Дас Р.Кадыровс, – ишттачу заманчохь дахар нисделла вайн, цундела йуьстаха латтар хуьлийла дац вайн берийн кхане къасточу оцу боккхачу хиламах».
